Una (meravigliosa) poesia del bravissimo Rosario Terracciano:
(Se solo stessi a sentire)
Si sulo stisse a sentere
Me uarde cu 'na faccia
'e fesso stralunato,
me dice "stai cammpanno
appiso a 'nu passato"
Me daje lezione 'e storia,
'e vita, 'e cumpassione,
me dice ca pure io
sò figlio 'e sta nazione.
"che vonno venì 'a dicere
'sti cunti 'e sti sentenze?
Chello ch'è stato è stato,
mò pienz'a ghì annanze."
Si sulo stisse a sentere
Me rire pure 'nfaccia
si parlo 'e 'nu burbone,
me uarde cumpassato
si manco fusse 'o bbuon.
Me faje l'elenco e tutti
chilli ca sò mmuorte
pe cienti ate cause,
cu 'na ragione o tuorte.
Me stizzi, m'arrepasse
e m'addimanni ancora
si provo sentimento
pe chistu triculore
Si sulo stisse a sentere
Me dice ca stò fora
da vuluntà 'e Dio,
si penzo ca m'he frato
chi tene 'o sanghe mio
Afforza me vuò fà sentere
chillo ca sta sbaglianno,
e afforza me vuò vennere
pe verità 'n'inganno.
Te sfuorze e me fà 'ntennere
ca 'e tiempi sò cagnate,
ca sonno 'a uocchie apierte,
ca sò n'allucinato.
Si sulo stisse a sentere
Si sulo stisse a sentere,
ma nun me staje a senti.
E parli, parli, e vuommeche
sentenze a maje fernì.
Nustalgico, patetico,
mò pure suvversivo
che ato cchiù m'he 'a dicere?
oltre che lavativo?
Si sulo stisse a sentere,
'mprestanno 'e recchie a 'o core,
capisse che vò dicere
campà cu 'o disonore
cusuto 'ncuollo ad arte,
e siconno la bisogna,
cu 'a stoffa do disprezzo
e 'o filo da menzogna.
Si sulo stisse a sentere
ma nun me faje parlà,
e parli tu sultanto
e allora aggia alluccà!
E allucco tutto 'o sdegno
che ancora nun se crede,
c'a 'a cientocinquant'anne
'a tiene sotto e piede!
E 'a suoffeche, l'umilji,
le faje ammancà 'o ciato,
'a faje sta zitta e muta,
dicenne ca è passata.
Ma a verità nun passa,
nun more, è sempiterna,
si tutt'attuorno è scuro
sta essa pe lanterna.
Sò cientocinquant'anne
ca nun me faje parlà,
ma io tengo sulo 'a dicere,
che voglio 'a verità.
Si sulo stisse a sentere,
ma nun me staje 'a sentì,
però si me sentisse,
me putisse capì.
